Германияда заңсыз көші-қонға қарсы қабылданып жатқан қатаң шаралар нәтижесін бере бастады. Соңғы бір апта ішінде ел аумағына заңсыз өтпек болған 750-ге жуық мигранттың жолы кесілді. Бұл алдыңғы аптамен салыстырғанда 45 пайызға артық көрсеткіш. Сарапшылардың пікірінше, мұндай өсім Германияның көші-қон саясатын қатаңдатуының тікелей нәтижесі.
Ел билігі шекаралық қауіпсіздікті күшейту үшін қосымша әскери күш тартты. Шекара бекеттеріндегі техникалық жабдықтар да жаңартылып, бақылау жүйелері жетілдірілді. Мұндай шаралар заңсыз мигранттар легін шектеуге бағытталған.
Ресми деректерге сүйенсек, 2023 жылы Германияға баспана сұрап 237 мың өтініш келіп түскен. Бұл Еуропалық Одақ елдері арасындағы ең жоғары көрсеткіш. Көші-қон ағынының өсуі Германиядағы ішкі қауіпсіздік мәселелеріне де әсер етіп отыр. Мәселен, жергілікті билік өткен жылы тіркелген әрбір оныншы қылмыстық оқиғада мигранттардың қатысы болғанын мәлімдеді.
Германия үкіметі бұл мәселені тек шекарадағы бақылауды күшейту арқылы ғана емес, сонымен қатар заңнамалық тұрғыда да реттеуді көздеп отыр. Алдағы уақытта миграциялық процестерге байланысты жаңа шектеулер мен талаптар енгізілуі мүмкін.
