Қатар астанасы Дохада өткен спорттық гимнастикадан Әлем кубогы Қазақстан спортшылары үшін табысты аяқталды. Ел намысын қорғаған Милад Карими бұл байрақты бәсекеде екі бірдей алтын жүлдені жеңіп алып, ұлттық құраманың абыройын асқақтатты.
Алдымен, Милад еркін жаттығулар бағдарламасында 14.466 ұпай жинап, финалдық сында қарсыластарының бәрінен басым түсіп, жеңіс тұғырынан көрінді. Бұл – Қазақстан құрамасының жарыстағы алғашқы алтыны болды. Осылайша, ол ерекше шеберлігі мен мықты дайындығын тағы бір мәрте дәлелдеді.
Бірақ Карими бұнымен тоқтаған жоқ. Көп ұзамай кермедегі жаттығуларда да финалға шығып, 14.500 ұпай еншіледі. Бұл нәтиже оған екінші алтынды әперді. Миладтың қос алтын жеңісі – оның әлемдік деңгейдегі үздік гимнасшылардың бірі екенін тағы да көрсетті.
Қазақстандық өзге спортшылар да жарыста жоғары нәтиже көрсетті. Алтынхан Темірбек еркін жаттығуда күміс жүлдегер атанса, Нариман Құрбанов ат снаряды жаттығуында қола жүлдені қанжығасына байлады. Осылайша, жалпы есепте төрт медаль еншілеген Қазақстан құрамасы беделді додада сенімді өнер көрсетті
