Маңғыстау облысындағы Құрық порты бүгінде еліміздің батыс қақпасында жаңа логистикалық және индустриялық кластер ретінде қалыптасып келеді. Өңірге жұмыс сапарымен барған Президент Қасым-Жомарт Тоқаевқа порт аумағында жүзеге асырылып жатқан маңызды жобалар таныстырылды.
Атап айтқанда, «Middle Corridor Shipping» атты жаңа қазақстандық кеме компаниясының даму перспективалары сөз болды. Бұл бастама Транскаспий халықаралық көлік дәлізін дамытуға тың серпін береді.
Сонымен қатар, Құрық портында «Саржа» көпфункционалды теңіз терминалы салынатыны хабарланды. Бұл жоба Транскаспий бағытының өткізу қабілетін бірнеше есеге арттыруға мүмкіндік бермек. Жобаны қазақстандық және халықаралық серіктестер бірлесіп әзірлеп жатыр.
Мамандардың айтуынша, Құрық портының әлеуеті артқан сайын, аймаққа инвестиция тарту, жаңа жұмыс орындарын ашу және көлік-логистика саласын жетілдіру бойынша жаңа мүмкіндіктер пайда болады.
