Шымкент қаласының әкімі Ғабит Сыздықбеков Қытайдың «Shaanxi Construction Engineering» компаниясының өкілдерімен кездесу өткізді. Бұл кездесу барысында қытайлық инвесторлар Шымкентте электр энергиясын өндіруге арналған ірі қоқыс өңдеу кешенін салуға қызығушылық танытты. Жобаның жалпы құны шамамен 150 миллион АҚШ долларын құрайды. Кешен елде теңдесі жоқ нысан болмақ, ол қоқысты жағу арқылы энергия өндіріп, түтін газдарын тазартып, шлактарды құрылыс материалдарына айналдыру сияқты маңызды экологиялық және өндірістік міндеттерді орындайды.
Айта кетсек, бұл кездесу 2024 жылы Шымкент пен Қытайдың Сиань қаласы арасындағы бауырлас қалалар қатынастары аясында басталған келіссөздердің нәтижесі болып табылады. Шымкент қаласының делегациясы жазда Қытай Халық Республикасына сапар шегіп, жергілікті қоқыс өңдеу зауытын зерттеп, тәжірибе алмасу барысында бірқатар маңызды келісімдерге қол жеткізген еді.
Аталған жоба нәтижесінде жылына 365 мың тонна тұрмыстық қалдық қайта өңделіп, шамамен 147 миллион кВт/сағат электр энергиясы өндірілмек. Бұдан бөлек, бұл кешен қала экологиясын жақсартуға, жаңа жұмыс орындарын ашуға және қала бюджетіне қосымша табыс әкелуге септігін тигізеді.
Кездесу барысында қала әкімі Ғабит Сыздықбеков шетелдік инвесторларға Шымкент қаласына қызығушылық танытқандары үшін алғыс айтып, қаланың әлеуметтік-экономикалық даму жоспарлары мен инвесторларға арналған қолайлы жағдайлар туралы ақпарат берді. «Shaanxi Construction Engineering» компаниясы қоқыстан электр энергиясын өндіру саласында мол тәжірибеге ие, ал әкімдік жобаны іске асыру үшін «Жол картасын» әзірлеуді тапсырды. Сондай-ақ, бұл кездесу де қол жеткізген келісімдер нәтижесі болып табылады.
